Отандық әлде халықаралық басылым? Ғалымдардың таңдауына мемлекеттің әсері: Қытай және Қазақстан

Аңдатпа

Мақалада Қытай мен Қазақстандағы халықаралық басылымдарда ғалымдардың жарияланымдарын мемлекеттік ынталандыру мен қаржылық қолдаудың нәтижелері қарастырылады. Зерттеу барысында келесі дерекқорлардың мәліметтері пайдаланылды: Қытай үшін – US SCI және EI Compendex, Қазақстан үшін – Scopus және Web of Science. Қытай үшін іріктеу стандарты CNKI (ең ірі әрі толық қытай деректер базасы) негізінде жасалды. Қазақстан үшін мұндай талдау жүргізілген жоқ, өйткені елімізде отандық ғылыми жарияланымдардың бірыңғай электрондық базасы жоқ. Әрине, экономикалық интеграция, сондай-ақ ғылым мен техниканың жаһандануы аясында кез келген елдегі академиялық зерттеулерді жаһандық ортадан оқшаулау мүмкін емес. Халықаралық жарияланымдар ғылыми дамудың алғышарты. Халықаралық жарияланымдар белсенділігінің белгілі бір пайызы ғылыми алмасулардағы қажеттіліктен туындайды. Зерттеу нәтижелері көрсеткендей, жетекші ғалымдар мақалаларын отандық ғылыми журналдарда емес, халықаралық рейтингтік басылымдарда ағылшын тілінде жариялауға басымдық береді. Мақалада осы саладағы өзекті мәселелер анықталып, авторлық тұжырымдар ұсынылды.